Côr CF1

Amdanom ni

Côr CF1 yw un o gorau mwyaf llwyddiannus Cymru. Ers sefydlu’r côr yn 2002, dan arweiniad Eilir Owen Griffiths, mae CF1 wedi datblygu o fod yn gôr aelwyd, i un o brif gorau cymysg y wlad. Ymhlith llwyddiannau’r côr mae ennill BBC Choir of the Year yn 2014, y wobr gyntaf yng Ngŵyl Gorawl Ryngwladol Derry yn 2018, y gystadleuaeth corau cymysg ac yna cipio gwobr Côr y Byd yn Eisteddfod Ryngwladol Llangollen 2022.

Yn ogystal, mae’r côr wedi ennill sawl gwobr gyntaf yng Nghystadleuaeth Côr Cymru, ac wedi dod i’r brig 12 gwaith yn yr Eisteddfod Genedlaethol. Mae’r côr hefyd wedi ennill Côr yr Ŵyl yn Eisteddfod Eryri 2005, Eisteddfod Llanrwst 2019, ac Eisteddfod Wrecsam 2025.

Mae’r côr wedi cael nifer o gyfleoedd cyffrous eraill fel canu gyda Take That a Lulu yn Stadiwm Principality yn 2019, canu yn agoriad swyddogol Canolfan Mileniwm Cymru yn 2004, a chanu yn Stadiwm Principality cyn gemau rhyngwladol, gan gynnwys Cwpan Rygbi’r Byd 2015. Yn 2016, cafodd y côr wahoddiad i ganu yng Nghynhadledd Mizoram Presbyterian Church yn Mizoram yn yr India. Mae’r côr hefyd wedi teithio i’r Unol Daleithiau, Canada, Gwlad Pwyl, Yr Almaen, Yr Eidal ac Iwerddon, heb anghofio ledled Cymru a Lloegr.

Mae’r côr hefyd wedi perfformio mewn rhai o leoliadau mwyaf godidog y byd yn cynnwys Trinity Church Efrog Newydd, Cadeirlan Köln yn yr Almaen, a Basilica St. Mark’s yn Fenis.

Mae’r côr yn ymddangos ar albwm Love Kraft gan Super Furry Animals, a Cantata Memora, Karl Jenkins. Mae CF1 wedi rhyddhau dwy CD hyd yn hyn ‘Côr Aelwyd CF1’ (2006), a ‘Con Spirito’ (2011), a bydd y CD diweddaraf yn cael ei ryddhau erbyn Nadolig 2025, ‘Cerddwn Drwy’r Tywyllwch’.

Eilir Owen Griffiths

Cyfarwyddwr Cerdd

Mae Eilir Owen Griffiths yn arweinydd corawl, cyfarwyddwr cerdd, a chyfansoddwr o Gymru. Gyda dros 25 mlynedd o brofiad yn y diwydiant cerddoriaeth, mae wedi arwain corau gan gynnwys CF1, Côr Godre’r Garth, Côr y Drindod, a Chôr y Gleision, gan ennill cydnabyddiaeth mewn cystadlaethau a chyngherddau yn genedlaethol a rhyngwladol. Yn 2023, sefydlodd Côr Ifor Bach, a enillodd Côr Cymru S4C yn ei blwyddyn gyntaf. Bu Eilir yn gyfarwyddwr cerdd Eisteddfod Gerddorol Ryngwladol Llangollen rhwng 2011 a 2017 yr ieuengaf i ddall y swydd benodol honno.

Mae’n arweinydd cysylltiol gydag British Sinfonietta ac yn cymryd rhan yn rheolaidd mewn cyngherddau a digwyddiadau cerddorol ledled y DU. Mae ei waith arwain wedi ei gymryd i Ganada, Iwerddon, Yr Almaen, Gwlad Pwyl, Ffrainc, India ac Unol Daleithiau America. Llwyddodd Eilir i dderbyn clod y beirniaid gyda gwobr yr Arweinydd yng Ngŵyl Gorawl Ryngwladol Derry, Iwerddon a hefyd yn yr Eisteddfod Genedlaethol Llanrwst yn 2019.

Fel cyfansoddwr, mae wedi ysgrifennu cerddoriaeth i artistiaid ac ensembles megis Bryn Terfel, Wynne Evans, Noah Stuart, Claire Jones, Dave Danford, Robyn Lyn, Cerddorfa Genedlaethol Gymreig y BBC, British Sinfonietta a Chôr Prifysgol Dechnolegol Warsaw. Perfformiwyd ei symffoni gyntaf ‘Gorau awen gwirionedd’ yn 2022, ac mae hefyd wedi derbyn comisiynau i gyfansoddi ar gyfer digwyddiadau fel Eisteddfod Gerddorol Ryngwladol Llangollen, Digwyddiad Coffa’r Holocost, a sefydlu Prifysgol Cymru y Drindod Dewi Sant. Yn 2008 ef oedd enillydd Tlws y Cerddor Eisteddfod Genedlaethol Cymru yng Nghaerdydd.

Ym maes addysg, bu’n gweithio ym Mhrifysgol Cymru y Drindod Dewi Sant rhwng 2005 a 2025, lle datblygodd raglenni gradd i hyfforddi actorion, cantorion, dawnswyr a chyfarwyddwyr. Sefydlodd Academi Llais a Chelfyddydau Dramatig Cymru (WAVDA) yn 2021.

Rhiannon Pritchard

Is-arweinydd & Cyfeilydd

Graddiodd Rhiannon o Goleg Brenhinol Cerdd a Drama Cymru yn 2009.

Mae hi wedi ennill nifer o wobrau am ei gwaith fel cyfeilydd a répétiteur gan gynnwys Gwobr Seligman Opera Cenedlaethol Cymru, gwobr Mansel Thomas CBCDC, a Gwobr y Cyfeilydd, a Gwobr Goffa Eleri Evans i gyfeilyddion yn yr Eisteddfod Genedlaethol.

Mae Rhiannon yn gyfeilydd poblogaidd ledled Cymru, ac yn gyfeilydd swyddogol i dair gŵyl gerdd fwyaf Cymru: yr Eisteddfod Genedlaethol, Eisteddfod Gerddorol Ryngwladol Llangollen, ac Eisteddfod yr Urdd. Dros y blynyddoedd diweddar, mae hi wedi gweithio gyda nifer o gantorion byd-enwog, gan gynnwys Syr Bryn Terfel, Gwyn Hughes Jones, Rebecca Evans, ac Elin Manahan Thomas. Mae hi ar hyn o bryd yn hyfforddwr llais a chyfeilydd ar gyfer adran llais CBCDC, ac yn diwtor piano preifat hefyd.

Mae Rhiannon yn gweithio gyda nifer o gorau, gan gynnwys yr arobryn Côr CF1, enillydd Côr y Flwyddyn BBC 2014, Côr Cymru S4C 2019 a 2022, a Chôr y Byd 2022.

Mae hi'n gweithio'n helaeth fel répétiteur ac animateur gyda nifer o gwmnïau gwahanol sy'n cynnwys Opera Cenedlaethol Cymru, CBCDC, Elusen Aloud, Tŷ Cerdd, Live Music Now, Mahogany Opera, The Forget Me Not Chorus, a Cherddoriaeth mewn Ysbytai. Mae ganddi brofiad helaeth o weithio mewn gwahanol leoliadau (prif ffrwd, ADY, Unedau Dementia, Cartrefi Gofal, a wardiau Ysbytai), a chyda grwpiau oedran gwahanol (cynradd, uwchradd, oedolion ifanc, pobl hŷn). Mae hi'n gweithio'n rheolaidd gyda Cherddorfa Novello a British Sinfonietta.

Mae cynyrchiadau nodedig yn cynnwys 'Dead Man Walking' a 'Blaze of Glory' gan Opera Cenedlaethol Cymru, 'Kommilitonen' Opera Ieuenctid Genedlaethol Cymru, 'Cunning Little Vixen' a 'The Marriage of Figaro' Coleg Brenhinol Cerdd a Drama Cymru, yn ogystal â nifer o gynyrchiadau Opera Scenes, a 'Tiger Bay' Canolfan Mileniwm Cymru.

Mae ei gwaith wedi ei hanfon i Affrica, America, Canada, India, UAE, ac Ewrop.

Richard Vaughan

Is-arweinydd & Cyfeilydd

Yn wreiddiol o Rydaman, Sir Gaerfyrddin, ac yn raddedig o’r Royal Holloway, Prifysgol Llundain, mae Richard yn bianydd o fri ac wedi ennill y wobr gyntaf yn Eisteddfod Genedlaethol yr Urdd ddwywaith â’r wobr anrhydeddus ‘Pianydd yr Wyl’. Mae wedi perfformio ledled Ewrop, gan gynnwys cartref Llysgenad Prydain â’r ‘Eglwys yn y Graig’ yn Helsinki.

Yn ogystal â’i gwaith gyda CF1 mae Richard yn Gyfarwyddwr Cerdd Côr y Gleision ac mae wedi gweithio fel cyfarwyddwr cerdd ac athro llais gydag ysgol ‘Big Talent’ yng Nghanolfan y Mileniwm. Mae wedi bod yn athro piano ers yn 15 oed ac yn parhau i ddysgu’n breifat.

Mae Richard wedi gweithio fel Ymchwilydd a Chynorthwy-ydd Cerddorol ar nifer o raglenni teledu, wedi ymddangos yn y cyfresi ‘Pam Fi, Duw?’, ‘Max-N’ a ‘2 Dŷ a Ni’ fel actor. Mae’n drosleisydd cyson ar S4C ac fel cyfansoddwr mae wedi ysgrifennu’r gerddoriaeth ar gyfer cynhyrchiad S4C o ‘Herio’r Ddraig’ a’r ffilm diweddar ‘Pianissimo’. Mae ei gyfansoddiadau a threfniannau corawl yn cynyddu mewn galw gan gorau o bob cwr o Gymru a thu hwnt.

Fideos

Ymuno â ni

Rydym yn ymarfer drwy gydol y flwyddyn, a chynhelir ymarferion yn Gymraeg. Mae croeso, hyd yn oed os nad ydych yn siarad Cymraeg.

Drwy gydol y flwyddyn, mae CF1 yn cymryd rhan mewn nifer o gyngherddau, cystadlaethau a gwyliau o bob math! Yn ogystal a’r canu, mae’r côr yn gymdeithasol iawn ac yn trefnu partïon haf, Nadolig, a nosweithiau allan yn ystod y flwyddyn.

Os hoffet gael rhagor o wybodaeth am ymuno gyda CF1, yna gyrra e-bost at [email protected]